(patoué de Vagrezentse)
L’é eun leugne su lo site di Guetset an noua séchón dédiée i berseuze eun patoué, mèriaou de noousa mémouére é trézor d’eun patrimouéno queulterel que s’è pa perdù grase a la trasmechón orala.
La berseuza l'é comme eun reflé de la queulteura de iaou arreuvve : no féi vére de bague groppée a la mitolojì, a l'istouére, i léjande, méi ivre an porta étó su le probléme di dzé, di mèinà, sur leur megnadzo é su la sosiétéi de si ten particuliéi.
Le contine de seutta séchón vo porterèn deun eun voyadzo deun lo conteste de la sosiétéi de campagne é de la fameuille patriarcala, eun cadro iaou seutta fonchón l’é belle totta eun tsardzo ou mondo di fenne. Le berseuze son pa tsantée renque di mamme, méi étó de totte le fenne de la fameuille de tcheu le-z-adzo : di granméye i seroou pi grante, di tante i neuresse que pouon èidjéi ou feunque reumplachéi la mamma deun se devouer.
De berseuze pa maque pe drumì, méi que pourton deun leur sonoritéi d’atre fonchón sécondére, comme salla de medjéi, demandéi protéchón ou bièn épouvantéi. A vo de le découvrì…