L'a comme titre "Lo dzardo di sabotì d'Ayas" la coueilletta de paolle que sarèn publiaye devendro 1 de oute 2014 deun la séchón Glosséo di site dediaye a la valorizachón di variante leungueusteuque valdoténe.
Son apepré 160 le mot trouoù (de seutte maque caque dizèin-e vequièi euncó) que le coppabouque é le sabotì eumpléyavon pe pa se féye comprende can allavon travaillì eun Piémón ou pi llouèn a l'itrandjì.
Si langadzo spéchal, lo djerc, l'ie fé avouì de paolle que eungn eumpléyave tcheu le dzoo mi eun lei baillèn eun sans diffièn, avouì de paolle d'origine jermanique, avouì de paolle eunventaye, etc.
La rentse de mot que no proupozèn, é que vo pouade accappé deun lo Glosséo de la quemeua d'Ayas, l'è lo rezultà d'eun traaille fé pe Alessandro Béchaz, reprèi dèisèn pe Saverio Favre. Si dérì l'a étó pritoù sa vouése pe eunrejistré tsaquin-e de seutte paolle.