(Patouè de Velanoua)
Lo 15 mase 2016 l'è reustéte féte la prémiachón pe la XXIIima édichón di Pri littéréo René Willien, euntituló a eun di pi grou promoteur di tradichón locale é tsertseur euntéréchà a la queulteua valdotèna.
Avouì l'euntroduchón de hi pri, l'amministrachón réjonala l'a voulù valorizé le-z-éditeur que l'an publià de-z-euvre d'euntérè queulterel, etnografeucco, arteusteucco ou jéografeucco pe la Val d'Ouha.
Lo premì pri de heutta édichón l'è reustó baillà a la quemun-a de Sen-Marsì pe lo livro Saint-Marcel : un pays, une communauté, une histoire, eumpourtanta contribuchón pe sovegardé lo passó de la comunitó. La Tipografia Testolin l'a aù, i contréo, lo secón pri pe la publicachón Émigrés, de Michela Ceccarelli, lo trijimo pri l'è aló a l'éditeur Le Château pe l'euvra Ad memoriam : storia e storie del cimitero del Borgo di Sant'Orso in Aosta, de Daniela Bernini.
Pe hen que regarde le menchón spésiale lo jurì l'a voulù recougnihe la calitó de catro euvre : Libres. César Dujany raconte sa vie à Giacomo Sado (Musumeci Éditeur), Dal Natale all'Epifania, de Alexis Bétemps (Priuli&Verlucca editori), Tesori di fede, de Roberta Bordon é Cesare Cossavella (Musumeci Éditeur) é Le guide del Cervino, de Enrico Camanni (edichón Le Château).