(patoué di-z-Amaveulle)
L’Assessorà di bièn queulterel, di tourisme, di-z-espor é di commerse de la Réjón otonomma Val d’Outa anonse lo prolondzemèn di “Projé Popón”, nèisù dza sacante-z-àn fé é réalizó eun collaborachón avouì l’Assessorà de la santé, di bièn-étre é di poleteuque sochale, pe l’Ajanse U.S.L. de la Val d’Outa étò, atò l’euntenchón d’euncoadjé l’uzadzo di patoué dèi to petchoù petchoù, grase a la créachón de conte gropéye a l’afféchón é a la tradechón valdoténa.
Dèi seutta senaa eun devàn, la peblecachón La lan-a di… vegneré distribuéye a tcheu le popón que nèison deun la Streteua de pédiatrie é néonatolojie de l’épetaill Beauregard de Veulla.
Si livret nèi d’eunna retsertse féte pe le-z-écouillì de seconda de l’écoulla primére de Tsarvensoù/Plan-Feleunna, deun lo cadro di 54° Concour Cerlogne que l’ayè comme tème A la déqueverta de noutre quemeun-e : le savèi-fiye d’eun cou.
Protso de la retsertse rendjamente etnografeucca é lengueusteucca réalizéye pe le-zécouillì su lo travaill de la lan-a, la caletó de seutta peblecachón se troue deun lo fé qu’eun pou totché le padze é la conta no démoutre todzor si caitsouza eun pi que tsaque mèinoù so baillé de sé mimo a travì se créachón.
Lo livro l’at étò dave contine que lo eunretsèison : La lana di bibì, écritte deun lo patoué de Sen-Veunsèn é La Lan-a di bieun deun si di-z-Amaveulle tsantéye pe dave artiste valdoténe, Liliana Bertolo é Maura Susanna. Pouéde le-z-acouté su lo site www.patoisvda.org eun partèn d’eun QR code.
Lo livret pouré servì i paèn pe reunforché le llétondze avouì leur popón é pe aprende tchica lo patoué étò.