(patoué de Tsaensoù)
Bièn cougnitre eunna lenva l'è pa llattoù i fé de bièn cougnitre lo térritouéo iaou l'è nèissia é sa queulteua. Pe seutta rèizón, eun prézente, deun seutta séchón, le non di llouà deun le diffiente variante de patoué ou bièn comèn tsaque locuteue de patoué baille non a sa queumeua.
Sensa calculé le-z-espréchón que deun lo ten son vin-e offichelle, n'at pe tsaque variante de patoué eunna dénominachón spésefeucca di diffièn llouà. So l'è doì i tsandzemèn fonéteucco que son capitoù deun lo ten è que totson totte le lenve prèdjaye. La grafia offichella, eungn effé, pa todzor respette avouì fidélitoù la fonéteucca di non di llouà, pèi lé comme le diyon le dzi que reston deun la quemeua, perqué teun contcho de eungn izamèn fé si l'orijine de la lenva, l'istouére é la littérateua.[1]
Le patouazàn eumplèyon donque eun non présì pe tsaque quemeua, mi pa maque : tradouèison deun leue patoué le non di quemeue vezeun-e ou de salle quemeue que l'an diffièn rapoo avouì leue (sariye a diye queulterel, économeucco ou de burocrasia, ecc.). L'è lo cas, pe ézeumplo, de Veulla que l'a diffièn non selón le variante de patoué. I contréo, can eun prèdje di quemeue que son pi llouèn, d'eun poueun de vua jéografeucco ou économeucco, son chouèn eumpléyaye le forme offichelle.
Seu dézot eun reporte la lista di non di quemeue deun le diffièn patoué. So l'è lo rezultà de eungn izamèn fé si le témouagnadzo di collaborateue que èidzon lo Guetset leungueusteucco é si le donné recoueillaye deun la Retsertse di non di llouà eun Val d'Outa, féta pe l'Asséssorà réjonal de l'éducachón é de la queulteua.
Deun le padze dediaye i quemeue valdoténe offichalizaye, vo pouade liye é acouté la prononsa di non de llouà eun fransé mi étó salle eun patoué (offichella ou pa).
[1] A. Bétemps, Micro-toponymie et graphie, « Nouvelles du Centre d'Etudes Francoprovençale R. Willien », n° 12/1985, Saint-Nicolas (AO).
