(patouè de Veullanoua)
L'Assessorà de l'éducachón é de la queulteua prézente i-z-écouillì di-z-ecoule maternelle é primére eungn'antolojì de teste d'oteur valdotèn, avouì le contenù adatto pe lo mondo di dzouin-o é que prègnon eun considérachón de sujè que vignon soèn trató eun classe.
Hisse teste son écrì souà deun nouha lenva de queulteua, lo fransè, que deun nouha lenva di queur, lo patouè. Lèi son euncò de teste deun le lenve di communoté walser.
Heutta pubblicachón, deun l'euntenchón de l'Assesseur Laurent Viérin, pourè eunretsì le cougnisanse di-z-eunségnàn é lèi baillé eungn eunstrumàn pe le-z-attivitó que organizon tcheu le dzoo eun classe, de magnii que le-z-écouillì pousuchan comprendre é aprésié la queulteua é lo particularisme de la Val d'Ouha.
Le teste son divijà eun séchón témateuque pe fasilité lo traille eun classe, surtoù pe le-z-attivitó didatteuque : montagne, sèizón, mèinoù, biche, moumàn de la tradichón.
S'è cherdù de prézenté tcheu le matériel eun verchón orijinella, mimo se lo livro l'è pe le pitchoù. L'eunségnàn dèi pe tchan-ì contcho de la complessitó di teste é di compétanse di-z-écouillì, mi eun jénéral la lenva l'è abbastansa comprensibla. La retsèhe di vocabuléo baillérè l'opportunitó de fée de retsertse su lo dichoun-éo.
