(patoué de Tsaensoù)
L'avin-ì di patoué, lenva di queue di Valdotèn, pou pa féye a mouèn di noue jénérachón, fondamantale pe mantin-ì sa survia deun lo ten : voualà perqué lo 3 setembro, eun Cogne, l'Assessorà de l'éducachón é de la queulteua l'at organizà la 1e Rancontre di petchoù patouazàn, pensaye a l'euntérieur d'an poleteucca queulterella, que l'a la finalitoù de beutté eun pià an séria d'inisiative que poueunton a la promochón é a la diffujón di francoprovensal deun noutra réjón.
Lo chouà de la queumeua de Cogne pe organizì seutta 1e Rancontre l'é doì i fé que seutta pégna communoté - i pià di Gran Pâdì - l'a todzor dimoutroù an forta vitalitoù é eungn attatsemèn i patoué é i tradechón. Lo dimoutre la prézense di groupe de téatro Lou Tracachemèn, di groupe folclorique Lou Tintamaro, mi étó de Le petit chœur de Cogne.
La Rancontre l'a comme finalitoù salla de féye retrouì eunsemblo tcheu le mèinoù, patouzàn ou pa patouazàn, eungn occajón de seutta groussa fita di patoué, iaou, a traè lo téatro, le tsansón, la mezeucca é le spòo populéro, la lenva é le mèinoù sarèn le protagoniste.
Seutta manifestachón, que l'a comme motte "Dzouyèn, tsantén, danchén é prédzén eun patoué, noutra lénva di queur", l'è itaye pensaye comme an dzornaye a mezeuva pe le mèinoù, comme eun momàn éssansiel iaou le dzovin-o pouon-pi dicouvrì le "llouà di patoué", deun totte se fourme é variétoù de seutta lenva é prende consianse de l'eumpourtanse de sovagardì la lenva di vioù, aspé considérablo de noutra communotì.
Di son coutì, l'Assessorà contenevve sa poleteucca pe mantin-ì le tradechón, le-z-uzadzo é le coutimme tradechonnelle é fe de totte pequé lo patouè sèye, i regar di noue jénérachón, rèizón d'orgueuille, perqué l'è la lenva idantitéra que transmé noutra queulteua é noutre tradechón pi vrèiye.
Baillì i patoué an noua via é noua dignitoù, cré deun le mèinoù l'amour pe leur Réjón é leur lenva, é lei apprèn leur santimàn d'appartenanse a noutra patria : sitte l'è lo douè de noutre eunstituchón. Seutte son le baze que deun an sochétoù moderna é eun contegnella évoluchón, permetton-pi i dzouin-o de crèitre é de vin-e sitouyaèn di mondo, sensa jamì oubliì iaou plondzon leur rèise.
La Rancontre di petchoù patouazàn va se djontì a d'atre projè avouì la mima finalitoù : lo Concour Cerlogne, l'Icoulla populéra de patoué, la messa eun patoué é eun lenva walser, la relanse de la Sivilisachón valdoténa a l'icoulla a traè nombreuze attivitoù - euntre seutte l'euntroduchón a plen titre di patoué deun l'offre scolére - la réalizachón d'an séria d'audio-livro é de Cd de mezeucca tradechonnella, avouì la diffejón deun le-z-icoulle valdoténe di Dichonéro di petsou patoésan, la réalizachón d'eun portal eunternet di francoprovensal valdotèn, l'espozechón "Les lieux du patois", la créachón d'an comédia muzicala eun patoué - que fegueure-pi deun lo programma de la prochéne Saison culturelle - é lo Projè Popón, consevì pe promouèire l'uzadzo di patoué dèi queun eun nèi.
Eun djoueunte a so que, deun lo beut de valorizì noutro patrimouéno immatèriel, l'Assessorà l'a prèi contà avouì l'Unesco pe la recougnissanse di patoué francoprovensal comme patrimouéno de l'umanitoù.
