La bénédechón di raamì, Rameliva eun patoué, l’è eun rite relijeu qu’eun fé la demendze devàn que Paque pe marqué lo comensemèn de la sente Senaa é anonché la feun de caèima.
Seutta demendze rapelle can Jézù l’et entró a Jéruzalèm deussù eungn ano é totte le dzi lo attégnaon é lo accompagnaon eun fiyèn nanté de grou raamì de palmié.
Eun baille totta sor de vertù estraordinée i brantse di plante bén-iye ; mimo deun l’istouére relijeuza de noutro continàn, la vénérachón di-z-abro l’at aù an plase eumpourtanta, pensé qu’eun tchi le-z-eunfidélo de sertén-e populachón, sisse qu’eungn accapae a lèi pourté de dan ou a le copé, déjàn sebì de tsatimèn téribblo.
I dzor de voueu, a Sen-Cretoublo, comme deun d’atre parotse de la Val d’Outa, la bénédechón di raamì veun bailléye devàn que Messa : le fidélo se retrouon a eun llouà deut é pourton leur raamì. Dèisèn eun fé an queurta prosechón canque a l’éillize pe choure Messa. A Sen-Cretoublo eun baille la bénédechón di raamì devàn la tsapalla de Nicoleun, dediéye a sente Barba é batia deun lo 1757.
Seutta fita relijeuza l’ie é l’è seurtoù pe le mèinoù que lamon pendre i raamì de bonbón de seucro, de ribàn é, comme l’è coteumma, catche pomme.
Deun le siéclle pasó, deun eun mouì de parotse de la Valló, eun pendjè caze renque de pomme. Eun créjè que seutte pomme l’achan pi aù de propriétó bénéfeuque pe la santé é pe prézervé d’itre mordù di bouiye. Le bonbón é le petchou-z-où de chocolà sayàn rer, maque le pi reutso pouchàn se le permettre.
De coteumma, lo raamì se varde i mitcho pe le protédjé. Fo po cayé ià si de l’an devàn, a la limitta eun pou lo beurlé.
Voueu lo dzor, pe fiye comme fan pertot, a Sen-Cretoublo é deun le-z-atre parotse valdoténe, eun cher de raamì d’olivié : n’a qui le-z-atseute é n’a qui le pren di plante que crèison deun la basa Valló.
Eun cou, de-z-olivié n’ayè po eun gneun sen eun Val d’Outa é adón prégnaon de lorié, de bouis é, deun catche quemeun-e, fenque de dzén-évro.
Deun lo passó, i dzor de Rameliva, comme pe totte le fite solanelle de l’éillize, vegnaon caze tcheu le parotseun é la partesipachón l’ie bièn sentua.
Ara, a Sen-Cretoublo eun tsertse de terié dedeun seurtoù le dzoveun-o eungn organizèn de momàn de préparachón a seutte fite relijeuze. So baille l’espouer de poussèi pourté eun devàn la tradechón de magnie pi conchanta.
