(patoué de Tsaensoù)
Deun la catégoria di bièn queulterel que son itoù cllassifià comme bièn immatériel le fite seville é salle de l'eillize que le accompagnon, l'an eun caro eumpourtàn. Pe totte le communoté, eunna fita l'è eun momàn pe s'accapé, é l'è i mimo ten eun momàn pe resté eunsemblo é pe partadjì la gran valeue de noutra idantitoù.
Eun Val d'ousta, se le fite seville ou de l'eillize de la tradechón son todzoo bièn vife - mimo se son belle pa izentaye di tsandzemèn llatoù a la réalitoù di dzoo de oueu - l'è grase i fé que le dzi son fran attatchaye a leue rèise.
Mi repourtì si le papì eunna fita, oueu, dequé lou diye ? Lou-tì diye de tchertchì de féye eunna fotografiye de seutta fita selón le coutimme de la tradechón ou bièn de la dicriye comme eun la fite oueu, de fasón réella, pequé l'è l'espréchón d'eun momàn de l'istouére, sochàl é queulterel bièn presì ?
L'è si seutta seconda idoù que lo projé de coopérachón euntre an frontchiye é l'atra l'è itoù pensoù, iaou la Val d'Ousta reprézentaye pe l'Asséssorà de l'éducachón é de la queulteua - eun di membro di projé - l'ayè l'euntsardzo de retchertchì 25 fite euncó bièn vivante, témouagnadzo de eunna tradechón pi ou mouèn viille.
Pe éizamin-ì eunna fita, l'è itoù desidoù de prende eun considérachón catro poueun de vua : si di fotografe, que arrite eun momàn i vaoulo ; si di documantariste, que l'è bon de beutté eun valeue lo caratéo ardì é le réachón ; si de l'antropologue que teurie foua la valeue di coutimme d'eun peuple ; é si de la dzi que avèitse pe capitta, que li le momàn selón son avì personnel, seu sentemèn é osservachón.
Lo volumo no fé agoutì, i comensemèn di tréjimo meullenére, la situachón di fite valdoténe, que sèyan ou pa de l'eillize, diffejaye deun le-z-Alpe ou maque deun lo térritouéo de la Val d'Ousta.
