(patoué dé Bretsón)
A pianetta qu'a comanda tsou segn l'é Jupiter, l'élémèn l'é o fouec.
O Soroi pasa nou signe tra o 23 dé noémbro é o 21 dé guijémbro.
Coulour : o bleu perse.
Pira da chanse : o turqués.
Métal : l'ehtàgn.
Djor chansà : o dedjos.
Caratére
Le djen dou Sajittére son pién dé fidutcha, contèn, guèi é sinsére. Son dé compagnón fidel, belle s'i l'an contùn a téhta vents i nébie. L'an eunna tservéla viva, ma sé lachon dichtrére é mancon dé contchentratsión. I créon moué nou demàn, son djénérous é sémbia qu'i l'ouson pa pouéra dé vénì poro. A iour véa l'é piéna dé contraditsión.
Vu qu'i lammon l'aventeurra, s'echtouffion vitto di tchoze é finque di djen. I sé marion soèn mach qu'un co ou rehton solet. Son d'echportif, lammon le béhte, le vouéyadjo é le londje permonà. I son rélidjous é l'an dé bone éntuitsión.
D'acohtuma, son dé djen ottimiste, qu'i l'an fidutcha én sé mémo é éntouziasme ; i l'an pa pouéra di dandjì, lammon l'éndipéndéntsa.
Vo y amich son gratsious é dichponébio, ma fa fére atentsión perquè ié va pocca pé ié fére amalì. Pé chanse, son pa pénabio é son pa bon dé fére o moro. Lammon cogniche moué dé djen é précatsé, ma pa pe tan ehcouté y atre. I son moué tacà a fameuya é l'an o don d'eunna londja jenesse.
L'an eunna bona salutte én jénéral, ma o iour fébio son le pormón é i déon fere atentsión a pa tchapé tan d'énfridoù é dé tos.