(patoué di-z-Amaveulle)
Lo lon d’eun voyadzo a travì lo ten é le lenve, chouì personadzo estraordinéo – an viille cartabla é eun saque di dzor de voueu, an viille plumma é eun marqueur alavia, eun per de soque é eun tabló euntératif – vo conton la conta de l’écoulla, dèi ier canque voueu, vua pe le joué di bague que l’an vequi-la. A partì de l’épocca ieui l’écoulla l’ie eungn’eunstituchón flésibbla, adatéye i ritme de la campagne, canque a salla ieui eungn apreste le dzoveun-o a la complésitó di mondo de voueu, si livro baille eun regar pachon-ó su l’évoluchón de l’éducachón su cattro jénérachón.
Lo patoué l’è lo queur de seutta conta. Baille la paolla i personadzo atò an lenva reutse d’istouére é de segnefecachón. I moyèn de leur conte, no esplorèn eun vocabuléo caze oublià é no déquevrèn de mot nouvì que son lo merieui di-z-aspé novateur de la via di dzor de voueu. Pe sélébré la diversitó lengueusteucca de la Val d’Outa, noutre personadzo prèdzon chouì variante de patoué, é tsaqueun-a reprézente eun llouà jéografeucco é queulterel déféèn. La cartabla prèdzeré donque lo patoué di-z-Amaveulle ; la plumma, lo patoué de Bretchón ; le soque, lo patoué de Vagrezentse ; menque lo saque prèdzeré lo patoué de Tsarvensoù ; lo marqueur, lo patoué de Tchallàn Damón é lo tabló euntératif, lo patoué de La Sala.
Si livro l’è lo fruì di travaill pachon-ó di-z-écouillì é di métresse é métre que l’an partisipó i 60° Concour scoléro de patoué « Abbé Jean-Baptiste Cerlogne ». Dédià a leur, si livro propouze po maque de conte pe eunvaléyé, mi étò an série de djouà didateucco pe allé eun devàn deun l’esplorachón de la lenva é de la queulteua. Perqué, comme no moutre lo ditón, devàn que ivrì le-z-ale é volé, fo avèi de rèis solidde.
