(patoué di-z-Amaveulle)
La grafia di toponimo l’è todzor eun tème délecat: sacante son le cas de grafie déféente pe lo mimo toponimo deun lo téritouéo réjonal é comunal étò. Lo tsemeun de l’ofichalizachón l’è donque nèisù pe tsertché de fiché de grafie quemeun-e.
L’et eungnouó avouì le dénominachón di 74 quemeun-e valdoténe, projé que l’a pourtó, deun lo 1976, a ofichalizé le non di quemeun-e de la Val d’Outa selón l’articllo 1 de la lloué réjonala n° 61 di 9 désambre 1976.
Le non di quemeun-e son eun fransé, sti que pe la queumeun-a chef-lieu de la Réjón ieui son considéró ofichel siye lo non eungn italièn “Aosta” que si eun fransé “Aoste”.
La nésesitó d’avèi an grafia recougnua pe tcheut l’a pourtó a prévire étò, todzor pe la lloué n°61/1976, de rendre ofichel co le non di veladzo, petchoù é grou, di llouà é de totte le localitó valdoténe pe décré di Prézidàn de la Jeunte Réjonala, aprì avèi sentù le Quemeun-e euntéréchéye.
La prateucca prévèi que le Quemeun-e mandèyan an demanda ofichella, eun beuttèn bo an lista di localitó a rendre ofichelle.
Eun partèn de seutta demanda, eungnoue an retsertse su de doquemèn déféèn pe vire comèn, lo lon di siécllo, son itó deut sisse llouà. Eungn avétse le grafie pi viille (deun lo Cadastre sarde, deun si orijinéo, deun le-z-archive istoreuque, deun le-z-archive de la parotse é de la quemeun-a), le grafie di dzor de voueu (teriéye di mappe réjonale ou de salle de l'Eunstitù Jéografeucco Militéro), le fourme eun patoué (teriéye di donné de l'eunquéte toponomasteucca) é d'atre sourse comme monografì, publicachón déféente é d'atro euncó.
Eun considérachón di donné recouilléye atò la retsertse, an Comechón esprés d'esper, noméye fran pe la consulanse é l'asistanse tecneucca é siantefeucca, fé se propozechón a la Prézidanse de la Réjón.
Seutta Comechón l’è noméye pe la Jeunte réjonala pe seunqu’an é l’è renouveléye a l’envión de tsaque léjislateua. Se compouze de di mouente tri membro é po de pi que chouì, cherdù euntre le dirijàn di streteue réjonale compétèn eungn’etnolojie é eun lengueusteucca, eun toponimia, eun vioù doquemèn, eungn’istouére é eun queulteua di téritouéo valdotèn é di comunitó locale, ou beun euntre le spéchaliste deun sisse séteur que fan po par de l’aministrachón.
Can n’a de séanse ieui la Comechón partadze se propozechón avouì la quemeun-a que l'a demandó l'ofisializachón, l'et euntégró co eun spéchaliste nommó pe la quemeun-a mima.
Eun pi, la lloué prévèi que le quemeun-e pouèyan désidé de djeunté, a coutì di non ofichel, de non eun patoué. Sisse non sarén pasó a l’éizamèn de la Comechón.
La désijón de la Comechón, pe sen que regarde la grafia di toponimo, veun prèiza su la baze de critéro présì, fichà pe la délibérachón de la Jeunte réjonala n°828 di 20 avrì 2012, comme pe ezeumplo lo fé que la grafia propouzéye sièye salla de la tradechón valdoténa. Donque, s’ajèi de grafie francofone que teugnon contcho di particularitó de la zona francoprovansala, mimo can se dépeuillon redjamente di riille di fransé.
La Comechón, euntre le défèn critéro adotó, l’a désidó de vardé la lettra z finala, qu'eun prononche po, se la voyella que veun devàn l’et atone (ézeumplo : Bionaz, Perloz,…) é de beutté le lettre d ou t a la feun, pe marqué que la voyella l’è toneucca (ézeumplo: Gignod, Arnad, Norat,…). Eungn a désidó, pe fenì, de vardé l’articllo que l'è prézàn deun l'espréchón orala eun patoué (ézeumplo: Les Combes, Le Clapèy,…).