A féra dé Sent Ors

L’é séntsa doutta a pi grousa féhta da Val d’Ohta. Pé douch djor, én pién ivér, bon ou gramo tén, dé meulle é dé meulle djen s’émouélon pé le tchumìn d’Ohta pé aité é, dé co, atchété le prodouì dé y artidjàn valdouchtàn. Én tsi douch djor, mehquià i diférénte léngue dou mondo, non pout éncorra sentì a mezécca di nohtre patoué.
An apré an, a féra a vièn contùn pi grousa. Dé simpio martchì organizà a la bona, l’a vénì eunna grousa organizatsión qu’a fèi travayé dé tsenténe dé djen. Ou momèn pi guiettà ou comerse, l’an djouenta-se dé momèn dé queulteurra é dé féhta.
Corra non vejeutta a féra dé Sent Ors, non pou troé diquié sé voya… Ma l’a pa ichtà contùn pe parì… A l’envión a y ira eunna féra dou bo é orra l’é un gro martchì dou qué sé véndon totte calétà dé tchoze. Moué dé djen lammon pa tso, ma le tén i tchandjon…
Ouèi, a féra a l’empich a maopart di tchumìn é di piatse da veulla. Tutùn, y artidjàn qu’i son éncorra atacà i viéye cohtume - é travayon o bo, a pira, o fer é a lana - i l’an vardà le pocht pi vièi qu’i van dé l’Arc d’Auguste a Piatsa Chanoux.
I guiòn qué a féra l’a meulle an. Pourtàn, le documèn pi vièi qu’i no nen prèdjon son dou XIII° - XIV° siécle : eunna pergaména dou 1243 qu’a couénta d’eunna féra qu’a sé féjae o 31 dé djénì é eun ehcreut dou 1303 qu’ou di dé eunna féra dé chi djor qu’a sé féjae én Ohta, tré djor dévàn é tré djor apré Sent Ors. Donca sé cognich pa l’an sur dé l’envión da féra, ma non pout imajiné qu’a l’ouse éncomintsà outor dé l’an meulle, corra l’économéa l’at aù un gro dévéloppemèn é corra én totta Éoroppa i l’an comintsà a nache verquiénte fére émportante. Tutùn, eunna couénta no di qu’a l’a nachù ou VIIIo siécle - é donca moué dévàn qué l’an meulle - corra Sent Ors l’at éncomintsà a doné dé tsoque i djen pi poro dou cartì…
L’é pacque a modé da mità dou XIXo siécle qu’i comintsén d’aé dé noéle sure da nohtra féra. Le premire énformatsión (1857) no prèdjon d’eunna piquioda féra qu’a derae renque eunna deméa djornà. Vers la fin dou siécle, mersì a eunna forta polétécca dé promotsión di piquiode « fabrécque » dou pocht féta pé o Comice Agricole, l’a pré pi d’émportantsa.
Dé tsou momèn la, djeuchto pé tré co l’a ferma-se : ou tén di doe guière, pé dé rajón qu’i sé compréndon bén, é ou tén dou Fascio, a coza d’eunna polétécca contrére é éntoléranta.
Ma o pi gro dévéloppemèn, a féra l’at au-lo éntó l’Otonomia da nohtra réjón. Dé féra di mouébio pé travayé a campagna, l’a vénì eunna féra dé y artidjàn é dé l’art, belle s’a l’a jamé perdù le caratére pi vièi é traditsionél. Pou sé fére qu’a l’é pé tsén ecquie qué le Valdouchtàn pénson qu’a séa un momèn fran émportàn pé a iour identité.

Teste dé Alexis Betemps