(patoué di-z-Amaveulle)
Eun Val d’Outa eun vagne la mirga canque dentor le 1000 mètre d’otcheui deun le queurtù é deun le tsan, la mirga crèi pe le térèn sablaou é bièn espouzó.
La mirga l’et arrevéye tar eun Val d’Outa, ver lo XVIII siécllo.
Pe caze dou siécllo, la polenta l’et itéye lo medjé de tcheu le dzor d’eun mouì de fameuille valdoténe. La faèina de mirga l’ie chovèn tsandjéye avouì de tartiffle ou de fromadzo. A Donnas, eungn ayè la coteumma d’apresté le miasse, eun mélandzo d’éve é de faèina de la polenta couet su lo fouà de la tsemeun-ó euntre dou fir arión. Vegnae foua eungn’espése de biscouì frolo qu’eun medzae a la plase di pan. Deun le queurtù, eun vagnae seurtoù de fèizoù eunramèn i cu de la mirga que pai servichè de rama. Le bitche pecaon bonlèi le foille de la mirga que, can sayàn sètse, rambouraon le paillasse.
Eun vagne la mirga caze todzor ver la feun di mèi d’avrì, a selón de l’otcheui é di ten. La mirga crèi a de températeue po tro base (eun dit que l’a fata di tsaat). Eun chouèn le conseill de la sajesse populéra, sertèn campagnar vagnon la mirga a la plan-etta di Sajitéro ou di Pèisón. La vagnon a man, deun le chou, eungn euntérèn le gran djeusto bièn ra téra. Le-z-eumpreuize agricole pi grouse, su de térèn de balle dimenchón, vagnon a machinna.
La mirga l’ou bièn d’éve : lo lon de l’étsatèn, eun la évie avouì chouèn eun cou pe senaa eun beuttèn bo l’éve deun le chou ou eun l’arouzèn.
A selón di variétó, tsandze la périodda pe la recouillé: salle pertensivve meuiron pi vitto, le-z-atre pi todzèn. De riilla, i mèi de novambre, eungn a to recouillà ià pe le tsan. Eun la recouille a man ou atò an machinna, de préféranse can la leunna cale. Le bovatte djeusto couilléye son euncó bondàn umidde é donque pouon panco itre moulue, pai eun le beutte sétché pe eun llouà seque é a l’er, comme eun pailler.
De riilla, eun llette le bovatte pe le foille dae pe dae é eun le pen a tsevà su eun fi.
L’éforié aprì, can le bovatte son bièn écheutte, lo campagnar le dégran-e. Lo dedeun de la bovatta eun lo beutte beurlé deun le fornet é le gran eun le pourte i meleun caze to de chouitte.
Veugnon moulù a la leunna que cale pai la faèina se varde pi pouza. Lo janre de faèina, pi ou mouèn figna, dépèn di gout de tsaqueun. Eun Val d’Outa eun lame mioù moudre tchica pi grouchì. Eun fameuille, eun varde la faèina dézò vouiddo, ou beun dedeun de saque de tèila ou i conjélateur canque i momàn de la eumpléyé. Voueu lo dzor no medzèn la polenta can y è na fita, can sen eun mouì de dzi, eun fameuille ou avouì le-z-amì. L’apresté l’è seumplo: d’éve, de so é de faèina. La polenta dèi couiye to todzèn é fo la modé todilón. Se l’è couette i fouà de bouque l’è co pi bon-a é l’a tot eungn atro gout. Can l’a levró de couiye, eun la vouidze deussù eun platì de bouque, dèi sen fo la copé atò eun fi.
Grasa (avouì de beuro é de fontigna) ou chourda, frecachéye eun pila, tcheut lamon la polenta.
