Vagné le tartiffle

(patoué di-z-Amaveulle)

Mimo se l’è djedjéye comme eunna di produchón d’éisélanse de la Val d’Outa, la tartiffla l’at an conta pitoù résanta. To comme le-z-atre prodouì arrevó eungn’Eroppa aprì la déqueverta de l’Amérique.

Semblerie que la tartiffla sièye arrevéye su lo téritouéo valdotèn lo lon de la seconda méitchà di XVIII° siécllo ; mersì a se propriétó fortefiante é i fé de pouèi la vardé fasilamente é pe pouza, la tartiffla s’è vitto difujéye.

Eun pi de itre an soursa eumpourtanta pe se nerì, fondementala pe gavé la fan i fameuille pi poue, l’è vigna to todzèn euntéréssanta di poueun de vua économeucco étò. Leur caletó recougnue, seurtoù de salle vagnéye deun le tsan de montagne, le tartiffle son itéye pouza eun moyèn d’étsandzo avouì de prodouì di plan, comme le tsatagne, le pomme é le peeut.

Le tartiffle son euntremì le prodouì pi prézèn deun l’alimentachón valdoténa. Deun lo pasó, mi maque euncó renque catche-z-àn fé, caze totte le fameuille l’ayàn eun tsan de tartiffle, que l’ie néseséo é bastae pe se nerì. Mimo se voueu lo dzor l’è pamì se tan eundispensablo pe l’économia domesteucca, eun vagne  todzor de tartiffle que son bièn aprésiéye.

Eun le vagne a partì de la feun di mèi d’avrì, deun de momàn déféèn selón le llouà é l’otcheui, mi teteun pitoù tar. Le bocón veugnon euntéró a eunna distanse de 20 a 30 santimètre é, dèi que le plante arreuvon a 25-30 santimètre, lo campagnar le tseuiche pe le protédjé di grame-z-erbe é, dèi sen, le-z-évie eun mandèn eun bo so d’éve deun le chou.

Eun tré le tartiffle dèi la feun di mèi d’oût canque a la feun de sétembro, an périodda de grou travaill, avouì l’édzo de totta la fameuille é di-z-amì. Pe le trée eungn eumplèye de moublo tradichonel é, deun le tsan pi grou, de machinne que rendon pi fasillo le détéré, le recouillé é fenque le chédre.

Eun varde le tartiffle a la crotta : eun le beutte a mouì deun de crot tsévó deun la téra, cllouzù pe de lan de bouque ou piatro eun le queutte deun le quése, i teup, é lé se vardon canque l’an aprì.

Caze totte le fameuille valdoténe l’ayàn eun petchoù tsan de tartiffle que sayàn eungn’eumpourtanta resoursa pe lo medjé é a la baze d’eungn’économia de otosusistanse : eun cou eun nen medzae tcheu le dzor de la senaa, a maenda é a signa. Mimo se le coteumme alimantére son tsandjéye i dzor de voueu, sacante fameuille vagnon euncó de tartiffle pe le medjé can n’an fata é can n’an voya.

La tartiffla, an verdjeui sensa gout?

Aaah… itéde quèi, piatro pourio m’eungreundjé.

L’è cheur que le dzen tsan ià pe le coute di montagne

V’èi jamì vu-le, é gnanca salle fleur délecatte,

petchoude étèile épandie ver la téra.

Mi tracachéde-vo po. Eungnouèn di dzerno, vo va-tì bièn?

Dèi can eun la vagne canque can eun meudze salla bon-a catagnoula,

ren l’è fé pe capitta;

ni la téra que la resèi,

ni la magnie de la trée.

Po de djestre pe to so!

É can tot l’è recouillà, l’è lo momàn de argoillé.

Tornó a la lemie, noutro féculàn s’eunvite pertot. Perbelù, frecachà,

grezì, eun dzouye atò le résette pe lèi fiye fita, comme eungn Allein,

ieui tcheut se peusqueutton pe l’agouté deun totte se fourme,

comme la sosa, an spésialitó locala aprestéye pe lèi fiye oneur.

Tcheu lo san: le-z-idó tsandzon é van avouì l’apetì.

É m’éton-o po de vo vire allé ià de inque avouì l’estomaque tsarmó,

avouì su le-z-épale eun grou saque de la remarcabla – l’è vo que lo diéde -

tartiffla de tchi no.

Que de détor pe monté canque su lé ! É pi vouélà lo plan euntremì le dicllo di lemeun-ó é catche-z-abro fouillù. É pi lo ver di plante de tartiffle avouì de pégne fleur blantse que bicllèyon sé é lé. La recolta saré cheur bon-a…

Te le tré totte euntéroilléye, dèi sen te le lave salle catagnoule dzane, rodze, pi petchoude é pi grouse ; é ara son lé, deun la grousa marmitta, preste a itre perbeluye.

Pleméye, lavéye, copéye a bocón, couette deun l’éve, conseméye canque a nen fiye viìn tendra l’ama dedeun eun laque bolequèn.

Tsou, fèizouleun é fèizoù, gneuf, toquet de pan deur é tartiffle a bocón. Pe le pi galeup, tchica de beuro de montagne pe contenté le paler pi feun.

To l’è tsapló. Ara fo modé. La sosa couè to plan todzèn. L’apresté l’et eungn ar a vardé, comme pe no la voya de la medjé !