(patoué di-z-Amaveulle)
Lo queurtù l’ayet an fonchón bièn spésefeucca deun la sosiétó rurala valdoténa, salla de permettre a la fameuille de poussèi se nerì a tsaque sèizón, d’étsatèn comme d’ivir. L’ie fondemental savèi vardé le prodouì di queurtù, pai eungn ayè de verdjeui to l’an.
Eun queultivae pitoù de prodouì que demandaon po tro de chouèn perqué la pi par di ten l’ie dedià a d’atre travaill pi eumpourtàn : fiye le fen, fiye i bitche é vagné lo blo. Eun cherdjè de verdjeui que l’ie lén-o fiye crèite é, seurtoù, comodde a vardé ; co le fasón pe le vardé sayàn seumple é prateuque.
Donque eun plantae de fave, de pézet, de fèizoù, de lenteuille, de couche, de gneuf, de tsou, de pos, de carotte rodze é de rave.
Pe vardé le tsou, caze pertot eungn aprestae la repouta : eun féjè baillé eungn’ondó i foille de tsou, dèi sen eun le vardae amouériéye dedeun de grou doill de bouque, a la crotta.
Lo queurtù di fameuille valdoténe, protso di mitcho, l’et eun croué bocón bièn sognà. Voueu lo dzor, to comme eun cou, lo queurtù l’è cllendó amoddo, l’a de priye de verdjeui, de plante que baillon de gout é de fleur que lo rendon dzen a vire é que servèison étò a atré le bitchette salutére. Tsaque sèizón l’a se travaill. D’éforié, can lo ten eungnoue d’itre tchica tido, eungn apreste lo térèn, dèi sen eun vagne, eun traplante eun chouèn la leunna é le plan-ette, mimo se n’a po de proue siantefeuque pe so. D’étsatèn, eun recouille.
Euntretèn fo évié, éserbié, apresté la téra pe vagné sen que eun recouilleré d’èitón é ramaché tcheu le dzor sen que meuire a tsacoù. Pe po beutté pédre le bague qu’eun recouille, chovèn eun le beutte i conjélateur. Teteun, deun sacante fameuille, eungn a co voueu la coteumma d’apresté la dzardegnie, eun mélandzo de verdjeui bolequéye deun d’éve é de vén-égro é beuttéye dedeun de bocal de vèiro.
Lèi vat an matse de ten é pi co de pachense pe apresté le conserve : fo lavé le verdjeui, le tsaplé é le beutté deun le bocal avouì bièn de chouèn. Si travaill, chovèn fé pe le fenne, l’et eun momàn de partadzo, pe apresté tot pe eun demàn. Eun recouille le fave é le fèizoù sèque, eun le dégroille, dèi sen eun le beutte dedeun de saquet de papì ou dedeun de bouite de toula : an partia eun la meudze d’ivir é l’atra saré pi vagnéye l’an que veun.
Pe vardé le verdjeui eun le pourte a la crotta (teuppa, pocca umidda é ieui n’a d’er) ou beun eun monte an seumpla choutta defoua pe l’ivir ou rendjamente de serre. Le verdjeui que se vardon mioù son salle pocca évasuye : le tsou, le carotte rodze, le rave, le gneuf, le pos é le couche. Le tsou son vardó i tsan ou beun a choutta, pendu tita lo bo , menque pe le pos eun tsève eun crot é eun le beutte dedeun pai se vardon blan é tendro. Selón la coteumma, eun varde le gneuf deun la sabbla ou deun lo réseun.
La magnie de planté lo queurtù é salla de vardé le prodouì son tramandéye caze todzor a vouése é eun fameuille.
Eungn Entroù, a la Mèizón Bruil-Mèizón de l’alimentachón, vioù mitcho rural é muzé etnografeucco se troue l’espozechón Conserver le souvenir… se souvenir pour conserver que l’ou fiye cougnitre le prodouì tradichonel, co sisse di queurtù, é comme son tsandjéye deun lo ten le magnie de le vardé.
L’aministrachón réjonala é l’Eunstitut Agricole Réjonal l’an organizó de cours de formachón que l’an a que vire avouì lo queurtù é la fasón de vardé sen que baille.
Dza dèi catche-z-àn, la quemeun-a de Donnas, eun collaborachón avouì la Réjón otonomma Val d’Outa, organize la manifestachón «Lo courtì» que l’a comme beut la promochón é la valorizachón di queurtù é de to sen que lèi crèi.
