Se no applequèn a la queulteua valdoténa la définichón di Petit Larousse que repourte : « eunsemblo de uzadzo, de couteumme, de maniféstachón arteusteuque, relijeuze, euntellettuelle que définèison é desteungon eun groupe, an sochétoù », no no apesissèn que la queulteua valdoténa prézente totta an sériye de manifestachón é fourme eungn eunsemblo coéràn. L'è bièn reutse, mimo se pocca cougniya.
Deun l'euntenchón de la féye mioù cougnitre é apprésiì, n'en pensoù de prézentì caque ézeumplo de son orijinalitoù é de sa complessitoù a traè la pégna prézentachón que chou.
Noutro traaille pourré pa itre complè : no louèn maque pouchì le dzi a cougnitre é approfondì si fénoméno. No tegnèn contcho eun particuillì de la littérateua valdoténa francoprovansala de si déri siéclle é demì, souà icritta que orala, de caque manifestachón arteusteucca, pe ezeumplo muzicala, é de caque tradechón eun jénéral.
