(patouè de Velanoua)
Lo 12 juillè de hit an, lo Comité consultatif de la Convenchón pe la protéchón di minoritó leungueusteuque nachonale di Consèille d'Oropa l'a publià son catrimo rappor su l'Italiye.
Hi éteudzo signale que bièn de minoritó leungueuteuque reuscon de sparì, comme halla de la Sardègne pe ézeumplo, a coza surtoù de la mancansa di sou nésesséo pe de-z-achón de conservachón.
Hi Comité denonche étò la mancanse de-z-inisiative de protéchón eunver le comunoté roms é sintés, que son soèn izoló pe rappor a la sosiétó.
Deun hi cadre jénéral pitoù négatif, lo Comité recougnì can mimo que éziste eungn Italiye, mersì a de llouè réjonale spésefeuque, de minoritó mioù protédjéye é que bénéfisiyon de pi de drouè. L'è lo cas, pe ézeumplo, di populachón de la Val d'Ouha, di Frioul-Vénétie julienne é di Trenteun.
Pe vire lo rappor complè, vezetode lo lièn https://rm.coe.int/CoERMPublicCommonSearchServices/DisplayDCTMContent?documentId=09000016806959ba.