(patoué di-z-Amaveulle)
Djeusto bièn aprì la chortua di livro dedià i Faux-Bourdon, eunna di rée espréchón muzicale fran de tchi no, lo portaill www.patoisvda.org s’eunretsèi d’an nouvila séchón dediéye a la mezeucca.
Su seutte padze eun retrase l’istouére de la mezeucca francoprovansala eun Val d’Outa, a partì de La fenna consolaye - tsansón que selón l’abbé Cerlogne remonterie i comensemèn di XIX siéclle - canque i-z-oteur-compoziteur résàn que l’an cherdù d’esprimé le leur santemèn deun leur lenva di queur, eun partèn de Magui Bétemps é Enrico Thiébat que l’an bièn baillà a la mezeucca valdoténa.
Aprì si tsapì, eun premì regar l’è fichà, comme veugnèn de diye, i janre di faux-bourdon.
La séchón se propouze étò de fiye cougnitre bientoù an cherdua de oteur que l’an compouzó é compouzon eun patoué.
Restéde avouì no pe déquevrì totte le bague nouvile que maamàn chorterén !