Tsen què non rèmarca mai dén li mié tchantsón l’ét sorteut l’amour pè la mià Tèra è la passión pè la polétécca.
Y éi non Christian Sarteur, so nachù en Ouhta lo 28/12/69, ichto en Ayas è fo lo jéomètre.
Déque y éro djoven m’ét vénì la passión pè la mezécca. Y éi coméntsà a sonà la guitara p’o mió cointo è appréséà contùn mai lo piajì d’ehcrére nto li léngue dou cour, lo Patoué è lo Fransé. Tsen què non rèmarca mai dén li mié tchantsón l’ét sorteut l’amour pè la mià Tèra è la passión pè la polétécca.
L’an 1990, aprés què y éi ehcrét euna iéjéna dè tchantsón, y éi rèjéchtrà euna cachetta nto lo titre «Val d’Aohta Libra», accompagnà dè la bèla vouè dè Liliana Burgay è renque nto l’organìn è la guitara.
Mersì a tsétta collèsión, pè cahque an a séve y éi coméntsà a sonà vià pè la Val d’Ouhta è la Savouè è y éi cognéchù dè gran muzisién è chanteur Valdotèn: Trouveur Valdotèn, Maura Susanna è lo compatriote Luis dè Jariot.
Nto lo fameu lijì dè y “auteurs-compositeurs” valdotèn, aprés apreprè 20 an, l’an 2001 y éi féit un noél album « Payoula », accompagnà pè dè muzisién valdotèn è enfioradjà pè lo méhtre Giorgio Negro.
Un éditeur dè Milàn, nto la Ethnoworld, l’a sentì li mié tchantsón, après aé pozà la pioutta avoi sé, y éi féi dè consert foura da Val d’Ouhta pè li téatre dè Milàn (Teatro Parenti, Teatro Misteriuos), dè fameuze betéque comme Messaggerie Musicali è FNAC, è nco pè dè bichtró bén cognéchù en Lombardie. S’ou pât nco bén dè radio y an coméntsà a pasà li mié tchantsón. Gramarsì a tso tsé, y an aprés, y éi féi un mouél d’echpétacle è sorteut euna sédérià a la Saison Culturelle régionale.
Ma, un djor lo sélèbre chansonnié Philippe Milleret è y inossidable Trouveur Valdotèn i m’an envéta a sonà ou festival muzical "Patoué en Mezeucca". Dè la m’a tourna pré la passión è mersì i compagnón muzisién y éi ehcrét dè noéle tchantsón, paré l’an 2020 l’ét sortì un noél CD "Robata lo rock", quiaramèn rock, contùn en Patoué è Fransé contùn pieu lantsà pè défénde la Val d’Ouhta.
Après y éi tourna féit quécca dè consert vià pè lo mondo, cahcùn solet entó renque la guitara è d’atre avoi totta la rock band, saréi a di avoi li muzisién compagnón: Luca Moccia, Patrick Faccini, Francesco Epiro è lo batteur è arranjeur éclectique Simone Momo Riva avoi qui y éi rèjéchtrà lo CD.
