(patoué de Gressàn)
La tradechón orala (queulteua, patrimouane oral é litérateua) l'é an fasón de vardé é de fiye cougnitre l'istouére, le coteumme é la litérateua i noue jénérachón deun le sosiétoù uméne que l'an pa de mouayén d'icreteua ou bièn que, pe de diféente rèizón, cherdon (ou son obledjà) de pa la eumpléyì.
Lo chouà di teste de seutta séchón, deun l'euntenchón de fiye vére l'eumpourtanse que l'oralitoù l'a èi deun le diféén peuple, teun pa renque contcho de sisse teste que, deun la tradechón orala, son vin-ì témouagnadzo icrì comme le conte é le léjande. Deun la lista n'a euncò de contine, de conte foule, de devinette mi surtoù de ditón que, tot eun vardén an connotachón orala, l'an èi an grousa eumpourtanse deun le diféente queulteue tanque can son itéye recoillaye deun de teste icrì.
Eunna partia di documàn que vo accapade deun seutta séchòn son lo rezultà de la retserte féta pe Alexis Bétemps pe lo projé Faire Connaître financhà deun lo programma PITEM Pa.C.E. - Alcotra 2014-2020.
