(patoué d'Euntroù)
Le diféèn patouè valdotèn l'an an grousa retsèhe lessicala, seurtoù pe hen que regarde lo mondo tradichonel. Tsicque moulo, tsicque traille l'a son non presì, de cou de non que l'an po de corespondàn dedeun d'otre lenve. Son de mo d'eun cou, reférè a an réalitó que i dzor de vouì l'éziste pomì é, pe hen lé, reuscon d'alé perdù... seumplamente pèquè dzoyon pomì, vu que dzoyon pomì gneunca le moulo que pourton hi non.
D'otre cou, i contréo, l'è la concuranse de d'otre lenve (seurtoù de l'italièn) que fa pèdre térèn i mo eun patouè. Le patouazàn l'eumplèyon de néolojisme é de calque, eungn oubliyèn le mo presì, étò pe la pèize de fée eun pitchoù éfor mental.
Dedeun hi conteste, lo dichoun-éo l'è eun bon édzo, a mimo de beté eunsemblo la retsertse lessicala é la nesessitó de baillé de reponse eun ten réel. Mimo eun témouagnèn le tsandzemèn di patouè, lo dichoun-éo l'oubliye po le vioù mo, hise que pi de tcheutte apartchagnon a la lenva.
Voualà lo péquè de heutta nouila séchòn que prézente le mo pi euntéressàn é otenteucco di patouè.
