(patoué di-z-Amaveulle)
L’alimentachón campagnarda di Valdotèn no veun de sen que noutre devantchì sayàn fiye, mi étò di-z-étrèite llétondze euntre lo téritouéo alpeun, le bièn matériel é la queulteua eummatériella. To comme le péizadzo de noutre combe veugnon di viille tradichón, di-z-espérianse paséye, di jeste de tsaqueun é di prateuque de tcheut – comme la costrechón di plantse ou di meur a sèque – eungn è coudzù, pe comprende l’alimentachón tradichonella di-z-alpe, de avétché l’agriqueulteua, la sosiétó, l’istouére di comunitó, la complessitó é la retsesse de noutro estraordinéo patrimouéno.
Deun le tsapitre de seutta séchón, vo pouéde déquevrì catche medjé euntremì le pi caratéreusteucco de la Val d’Outa que son itó recouillet grase a la retsertse féte pe lo projé AlpFoodWay, financhà pe lo programme de coopérachón téritoriella transnachonala Alpin Space é publià deun lo livro Alimentation Paysanne, réalizó pe lo Départemèn réjonal di Bièn queulterel, di Tourisme, di-z-Espor é di Comerse, éditó pe Le Château deun lo 2022.
Imadze : Thibault Nieudan
Teste : Alexis Bétemps, Marilisa Letey
Preui di tsapitre écrì pe Alexis Bétemps pe lo livro « Alimentation paysanne en Vallée d’Aoste »
(patoué di-z-Amaveulle)
Diye sen que l’è pla tradichonel de la Val d’Outa l’è po seumplo é l’è néseséo cougnitre comèn, senque é can medzaon noutre vioù pe protédjé é beutté eun valeur noutra gastronomia. Le pla tradichonel propouzó i touriste son an soursa eumpourtanta de gagnadzo é eun patrimouéno queulterel identitéo pe le dzi de inque. Teteun, fo le-z-avétché avouì respé é prudanse. La Val d’Outa l’a eetó an matse de tradichón locale, comme salla bordzouéze iverta i-z-eunfluanse di réjón a l’entor que prodouijaon de medjé déféèn de sisse di campagnar. Le souye de la bordzouézì sayàn bondàn reutse, avouì de medjé que le campagnar cougnichaon po.
Le tri grouse tradichón valdoténe, bordzouéze, cléricala é campagnarda, sayàn protso é frecantaon le mime martchà é le mime fèire.de Veulla. So l’a permettù i dzi d’aprende de nouvile coteumme de quezeun-é eungn eumpléyèn le prodouì réjonal. Seurtoù le fenne que travaillaon comme servente tchi le fameuille aprègnaon a apresté medjé é vardaon le résette que l’ayàn apreui pe eunretsì la tradichón de quezeun-a de leur comunitó. La tradichón l’è donque vigna pi reutse de-z-idó é de-z-eunfluanse nouvile.
« Medjé atò le dae man » l’et eungn’espréchón di patoué de Véèye que se refé a eungn’épocca ieui lo medjé l’ie chovèn rachon-ó é de grama caletó. Can mimo, magrì le privachón, sen que le vioù rapellon, son de dzen souvenir. La poua viya d’eun cou l’a permettù d’asété é de sepourté le soufranse é de nen fiye eun patrimouéno vequì. Eun Val d’Outa la quezeun-a campagnarda l’ie caze pertot égala é lo medjé l’ie gropó a la produchón locala, a la disponibilitó de sout, a la fasón de savèi vardé, a catche-z-étsandzo de comerse é de danré.
Le dzi de montagne é sisse de plan étsandzaon le danré : de fromadzo é de beuro, de tartiffle é de blo contre de frutte, de tsatagne é de verdjeui que crèichaon po su aat. Lo blo crèichè canque ver le 1900-2000 mètre ieui eun pouchè vire de balle plantse que d’étsatèn, lo lon di coute, s’arbeillaon de dzano. Tsaque fameuille l’ayè de lasì, de tsir, eun ou dou cou pe senaa d’ivir é de frutte comme le peeut, le pomme, le sèryize, le niple é le bregnón. Deun la Basa Valló, n’ayet di mouente 15 variétó de tsatagnì entó avouì an produchón que l’et itéye eumpourtanta canque i premì djé-z-àn di siécllo pasó. Eun féjè lo veun é eun recouillae pe lo bouqe tot a sor de petchoù fruì pe fiye de confiteue ou de salade. De boulì n’ayè caze jamì su la tabla di campagnar.
Sayàn maque le mocheu que pitsaon deun le torón é deun le djouiye. Le campagnar féjaon lo fromadzo é lo beuro atò lo lasì di vatse, dèisèn lo vendjaon pe atseté d’atro comme le-z-espise, la tsir é catche bague pi retsertchéye comme lo cafì pe le fenne é lo tabaque pe le-z-ommo. Faillè fiye de-z-économie pe pouèi mandé eun devàn la fameuille.
Lo nombro di souye deun la dzornó tsandzae a selón di sèizón é di-z-eungadzemèn de travaill. Dèi lo dzor de Sen-Bartolomì canque a Sen-Zozè, eun medzae tri cou pe dzor. Eun féjè dédjón djeusto lévó é maenda l’ie la souye preunsipala tcheut eunsemblo. A signa eun medzae po gran bague é caze todzor le mime : de seuppa de verdjeui ou i lasì avouì de pan é de fromadzo mégro. I fen, eun féjè eun reussegnón ver seunqu’euye de la dèinon-a pe baillé tchica de fose. D’étsatèn eun medzae de seuppa i lasì avouì de paate ou de ris dedeun. Eungn ayè po la coteumma de eunvité de-z-amì ou de paèn, sti que can n’ayè de fite de fameuille.
Eun cou, la comunitó organizae de momàn pe medjé eunsemblo : lo reussegnón ou la véillà d’ivir. Sayàn de-z-occajón pe étsandjé le dérie novalle, pe le conte é le léjande. Sisse momàn sayàn organizó pe fiye de travaill tchica eungnouyèis, mi po lagnèis. Lo reussegnón l’ie tchica la paye pe le dzoveun-o que travaillaon sensa saléro pe lo plèizì d’édjé le pi fèiblo, Le sèiteui féjaon an réfia a métchà mateun-ó pe medjé é bèye eun vèiro de veun. Can lèi sayàn le corvé, tsaqueun pourtae tchica de medjé é eun partadzae euntre tcheut. I venendze eun féjè fita eun medzèn a la veugne de pla tradichonel.
