La produchón de l’é de via

(patoué di-z-Amaveulle)

La produchón de l’é de via l’è an tradechón d’estrà viille eunraseun-éye eun Val d’Outa ieui eun prodouèi de pi todzor bièn de veun é ieui d’èitón fé friquet pe vardé amoddo lo déque, matchie premie pe fabrequé l’é de via.

Co voueu lo dzor, sacante petchoù produteur distillon pe leur contcho leur déque, ou beun se beutton eunsemblo, pe nen dzoure eun fameuille. Lo ten de la produchón l’è ver la feun de l’èitón (i mèis de novembro é désambro) can, aprì avèi terià lo veun, lo déque l’è tot ou caze tot fermentó. Lo déque l’è sen que reste aprì avèi terià lo cller: pi, pepeun é lo bouque de la rappa. Aprì avèi-lo foló é treillà, eun varde lo déque dedeun de grou bidón erméteucco.

Tsaque petchoù distilateur pou maque distilé p’eun ten limitó, fichà su la baze di mètre caró de veugne que tsaqueun l'at (que sièye propriétéo ou locatéo) é de la cantitó de la produchón aprì avèi demandó, tsaque an, lo condjà i buró prépouzó.

Eun distille selón de tecneuque consolidéye deun lo ten. Le déféèn momàn se chouon avouì eungn odre bièn presì, comme eun rituel. Le-z-aabeuque eumpléyà eun Val d’Outa pe fiye l’é de via son de tri caletó é tsandzon l’eun de l’atro pe la magnie d’étseidé lo déque: a fouà diret, a ben marie é a vapeur.

Sisse a fouà diret son étseidó atò de bouque. Lo petchoù distilateur cher lo bouque é lo apreste avouì chouèn: van bièn seurtoù le bouque deur comme lo fayé, lo tséno é lo fréno (lo bouque det itre san manqué copó a la leunna que crèi) perqué beurlon todzèn é réguillé.

Fo que l’é de via colèye to plan, gotta aprì gotta ou atò eun fi bièn preun.

Fo cayé ià la premie é de via que chor de l’aabeuque, la tita, perqué l’è grama é fenque danjereuza pe si que la bet.

Catche petchoù distilateur l’an la coteumma de aromatizé l’é de via. Lèi djeunton de plante aromateuque que couillon leur mimo: lo cumeun, la sarioula é la routa.

Voueu lo dzor comme eun cou, eungn eumplèye étò l’é de via deun la medeseun-a populéra, seurtoù tchi le rabeilleur.

A coutì de la produchón de fameuille, n’at euncó salla eundustriella que chou le magnie de fiye tradichonelle, mi su eun plan pi grou, bièn  cheur, eun permettèn i prodouì d’allé pi llouèn di confeun de la réjón.

Deun lo rezeun to l’è bon, de se gran-e que l’an coueutte de no baillé de bon veun canque i déque que no rezerve eun bièn précheu étò. 

Seu précheu que, djeusto bièn levréye le vénendze, le-z-aabeuque de totta la Valló fremiatton dza de falèi attendre euncó de londze senaa devàn que eun le dépomblèye, devàn que eun réyèye le fouà é que eungnouèye lo gran rituel. 

Adón, tsaqueun pachente é se beutte a fiye de fromanse su la caletó de l’é de via que chorteré. L’è fran de l’é de via valdoténa qu’eun prèdze inque, de seutta é d’eunvia de la veugne que no-z-étseuide le dzoute aprì eun bo denì, de seutta petchouda poueunte espiritueuza que baille, caze a catsón, bon gout a noutro cafì.

Catcheun d’euntre no la lame dzoveun-a, seumpla é clléa, d’atre la lamon mioù ambréye, afinéye deun le bosse de bouque, sensa oublié sisse que la asadon maque se l’a lo bon flo di-z-erbe é di frutte. 

Questchón de gout é de coleur…  sti que can le petchoù distilateur de la Valló a fose chorterén de leur repoù, que leur sérémonia alchimeucca reprendré deun le vapeur de l’èitón, no treunquèn pi tcheut eunsemblo a la santé de l’ommo é di rezeun.